Personat që janë të infektuar me Covid-19 nuk do ta kenë të mundur të votojnë në zgjedhejt e ditës së nesërme. Më herët Ministria e Shëndetësisë publikoi bilancin ditor nga i cili u bë i ditur se në total janë 23 021 raste aktive me virusin në të gjithë Shqipërinë, pra po kaq persona nuk do të mund të votojnë.
Çfarë ndodh nëse persona të infektuar me koronavirus shkojnë për të votuar?
Më herët kreu i KQZ, Ilirjan Celibashi ka sqaruar se çdo qytetar që do të paraqitet në qendrën e votimit, nuk do të kthehet pas pa votuar. Kjo pasi nuk ka mekanizma që mund të vërtetojnë nëse një person është I infektuar ose jo. Gjithsesi nëse një person që është me Covid dhe konstatohet se ka dalë nga banesa duke thyer kështu karantinën, policia do të marrë masat që parashikohen në aktin normativ.
Komiteti Teknik i Ekspertëve mori më parë vendimin se edhe emigrantët që kthehen nga Maqedonia e Veriut dhe nga Greqia duhet të qëndrojnë në karantinë dy javore, pra rrjedhimisht nuk do mund të votojnë. Kjo çështje ngjalli debat të fortë mes palëve politike, në të cilin u përfshi edhe presidenti Meta. Apeli Administrativ mori vendimin që kjo masë të mbetej në fuqi.
