Fëmijët janë burimi më i rëndësishëm i të ardhmes ekonomike të një shteti e shoqërie.
Qasja në kërkesat thelbësore shëndetësore, arsimore dhe ushqimore për çdo fëmijë, mundëson akses më të barabartë në punë më të paguara më vonë në jetë. Por sa zbatohen këto të drejta rrotull në botë?
Shqipëria renditet në vendin e 52-të ndër 185 shtete botërore, sipas Indeksit të të Drejtave të Fëmijëve 2023, studim i përvitshëm i Fondacionit me të njëjtin emër, në bashkëpunim me Erasmus School of Economics.
Një vit më parë, Shqipëria renditej në vendin e 56-të, ndaj këtë vit ka parë një përmirësim të lehtë prej 4 pozicioneve. Megjithatë, krahasuar me rajonin, ne jemi të fundit, ku performancë më të mirë ka Serbia e renditur e 28-ta, Bosnja dhe Hercegovina e 30, Mali i Zi i 42 dhe Maqedonia e 45.
Kryesojnë listën me të dhëna më të mira që garantojnë të drejtat e fëmijëve Islanda, Suedia dhe Findlanda, ndërsa të fundit në listë ndodhen Ccad, Afganistani dhe Sierra Leone.
Sipas metodologjisë së këtij indeksi, merret për bazë e drejta e jetës, e drejta e kujdesit shëndetësor e drejta e edukimit dhe ambientin që siguron garantimin e këtyre të drejtave për fëmijët.
Fondacioni Kids Rights që përpilon edhe raportin për një dekade, i bën apel qeverive të ndryshme të globit që të investojnë më shumë për fëmijët në këtë drejtim, pasi buxhetet janë të pamjaftueshme./RevistaMonitor
