Emigrimi i studentëve të kualifikuar, po ndikon negativisht në vendet e varfëra.
Sipas një raporti të UNESCO-s, Shqipëria renditet në 10 vendet me hemorragjinë më të lartë të njerëzve të arsimuar, shkruan “Monitor”.
Bazuar në rezultatet e studimit, deri në 2010 nga Shqipëria kishin emigruar 26% e personave me aftësi të zhvilluara.
Në Europë, Shqipëria dhe Malta janë vendet me përqëindjen më të lartë të emigrimit të personave të arsimuar, ndërkohë në rang global janë Eritrea, Grenada, Haiti, Sri Lanka, etj.
Gjithashtu sipas studimit, rezulton se të rinjtë që ikin, kanë prirje të mos kthehen në vendet e tyre.
Në këto shtete, ndodh fenomeni i keqpërdorimit të fondeve publike për arsimin.
Sipas të dhënave të OECD (Organizatë për bashkëpunimin dhe zhvillimin ekonomik), emigrimi i shqiptarëve të arsimuar në vitin 2010 dhe 2011 është rritur me 223% krahasuar me 10 vite më parë.
Këto shifra e rendisin vendin tonë, në mesin e 15 shteteve për emigracion të lartë të personave të arsimuar dhe me grada shkencore.
