Studentët e Mjekësisë kanë dërguar në Strasburg shtetin shqiptar për të kundërshtuar ligjin që i detyron të punojnë në Shqipëri pasi të diplomohen.
Padia kundër shtetit u depozitua sot në Gjykatën Europiane të të Drejtave të Njeriut. Vendimi vjen pasi studentët shënuan një fitore të vogël pasi Gjykata Kushtetuese urdhëroi ndryshimin e një pike në ligj, atë të punës me detyrim në Shqipëri pas diplomimit.
Më 25 Janar të këtij viti, Gjykata Kushtetuese ka marrë vendimin për të ndryshuar pjesërisht ligjin për studentët e Mjekësisë. Në vendimin e marrë me shumicë votash, trupa gjykuese ka vendosur që kufizimi me 5 vite për të gjithë të diplomuarit nuk është propocional me afatet e shlyerjes së detyrimeve nga studentët ndaj shtetit. Pra, neni 4 i ligjit rezulton më i ashpër se sa nevoja dhe kërkohet që të ndryshohet brenda 3 muajve të ardhshëm nga Kuvendi i Shqipërisë.
Në rastet kur punësimi nuk realizohet brenda 3 muajve për shkaqe që nuk varen nga mjeku, deri në krijimin e mundësisë për punësim në institucionet shëndetësore publike, për një periudhë deri në 9 muaj, mjekut i lind e drejta të trajtohet me 80% të pagës së mjekut të përgjithshëm në kujdesin parësor.
Projektligji i ri për studentët e mjekësisë u miratua në muajin korrik të vitit të kaluar si masë për të frenuar largimin e mjekëve dhe infermierëve nga Shqipëria.
