Tatimorët kanë zbarkuar mesditën e kësaj të hëne te bizneset e kreut të FSHF-së Armand Duka. Kontrollet vijnë pas sulmit të nisur ndaj tij nga kreu i bashkisë së Tiranës, Erion Veliaj, për zgjedhjen e Presidentit të FSHF-së.
Duka është shprehur se Veliaj do t’i marrë të gjitha me dhunë dhe kjo është një mënyrë se si ai vepron.
“I ka marrë të gjitha institucionet dhe do të marrë edhe këtë, do ta marrë me dhunë. Jo nëpërmjet këtyre kërcënimeve. Absolutisht që po, nga Erion Veliaj. Këto kanë shkuar edhe në sinkron. Kanë shkuar edhe tek anëtarët e tjerë të federatës që merren me biznese. Kanë shkuar edhe tek të tjerët. Ky është një sulm në të drejtën qytetare. Nuk është problemi vetëm i joni, por i mënyrës se si veprohet. Kjo është shumë e ndyrë, rrezikon lirinë e njerëzve, biznesit. Kërkon të marrë të gjithë pushtetin në Shqipëri. Një akt shumë i shëmtuar”, u shprehu Duka.
Kujtojmë se Bashkia e Tiranës deklaroi ditën e djeshme që në cilësinë e aksionerit të Klubit të Futbollit, të fillonte një hetim kombëtar dhe ndërkombëtar për shkeljet dhe korrupsionin 20 vjeçar të Armando Dukës në Federatën Shqiptare të Futbollit.
Ndërkohë pa vonuar shumë, si asnjëherë më parë, Prokuroria e Tiranës ka nisur hetimet për kreun e Federatës Shqiptare të Futbollit, Armand Duka. Disa ditë më parë kryebashkiaku Erion Veliaj ka thumbuar kreun e FSHF-së, Armando Dukën i cili është vënë në qendër të vëmendjes për shkak të tentativave që po përpiqet të bëjë për të manipuluar zgjedhjet në futboll. Teksa rrëfeu për një takim që kishte pasur me ish-kapitenin e Milanit, Gennaro Gattuso, Veliaj tha se ‘sporti shqiptar nuk mund të jetë biznesi i llumit’.