Floriana Garo do të jetë zëdhënësja e Partisë Demokratike gjatë fushatës për zgjedhjet e 25 prillit. Lajmi u bë i ditur dy ditë më parë, kur u bënë publike dhe listat për deputetë. Ish-misi mbajti sot deklaratën e parë për PD, ndërsa më pas i ka uruar mirëseardhjen edhe kryedemokrati Lulzim Basha.
Ai ka ndarë foton e Floriana Garos nga konferenca e sotme, ndërsa krah fotos shkruan:
“Mirë se erdhe Floriana!”
Floriana Garo nuk është e vetmja nga vajzat e ekranit që i është bashkuar Partisë Demokratike në këto zgjedhje. Po ashtu edhe Ori Nebiaj do jetë kandidate për deputete e PD në qarkun e Tiranës, ku renditet në vendin e 18-të në listë. Ajo ka qenë më parë pjesë e strukturave të PD, ku ka garuar përballë Belind Këlliçit për drejtimin e Forumit Rinor demokrat.
Nga ana tjetër Floriana Garo pasi u zgjodh “Miss Shqipëria” iu përkushtua ekranit ku drejtoi emisione të suksesshme si “Jo vetëm modë”.
Ndërkohë, në listën e Partisë Demokratike garojnë edhe figura të tjera të njohura si shkrimtarja Flutura Açka, analisti Mark Marku, Agron Gjekmarkaj etj. Vetë kreu i PD do të garojë në qarkun e Tiranës ku renditet i pari në listë, dhe pas tij vjen Jorida Tabaku.
