SPAK ka nisur hetimet për disa zyrtarë të policisë, të cilët dyshohet se kanë kryer takime të paautorizuara me Roven Zekën, të paraburgosurin për korrupsion.
Gjatë hetimeve, janë marrë deklaratat e të paktën dy shefave të komisariateve në Tiranë, ndërkohë që është sekuestruar një telefon dhe janë kontrolluar kamerat e sigurisë.
Po ashtu, ka pasur hetime edhe për një biznesmen, i cili është bërë subjekt i prokurores Elida Kaçkini. SPAK ka pyetur gjithashtu personat përgjegjës në Bllokun e Sigurisë në “Mine Peza” për të sqaruar detaje mbi takimet me të paraburgosurin dhe arsyet e mundshme të këtyre kontakteve.
Roven Zeka, shef i Komisariatit të Policisë Rrugore të Tiranës, bashkë me Sokol Novakun, shef të Hetimit të Aksidenteve, dhe oficerin e policisë rrugore Edison Tabaku, u arrestuan disa ditë më parë në kuadër të një hetimi të SPAK për korrupsion.
Dyshohet se ata kanë pranuar 2 mijë euro ryshfet për të manipuluar provat lidhur me një aksident rrugor të shkaktuar nga bashkëshortja e një biznesmeni. GJKKO ka dhënë masën e sigurisë “arrest me burg” për të tre të dyshuarit.
