Ditën e sotme, presidenti Ilir Meta priti në Presidencë kerët e partive të opozitës së bashkuar.
Në një njoftim për mediat, Presidenca bëri me dije, se Meta informoi krerët e partive për procesin e manipulimit të emërimeve të Gjykatës Kushtetuese.
Sipas presidentit ky është skandali më flagrant i reformës në drejtësi.
Më tej ai u bëri me dije krerëve të partive, se do të ndalojë puçin kushtetues.
Ndër të tjera kreu i Shtetit përshëndeti hapat e ndërmarra nga opozita, për miratimin pa asnjë vonesë të reformës zgjedhore, si dhe për zhvillimin e zgjedhjeve të parakohshme.
Në fund Meta vuri në dukje se përmbushja urgjente e kushteve të Bundestagut është rruga e vetme për ndalimin e shpopullimit dramatik të vendit.
Njoftimi i Presidencës:
Presidenti i Republikës, Ilir Meta, zhvilloi sot një takim me kryetarët e partive të Opozitës së Bashkuar, drejtuar nga Kryetari i Partisë Demokratike, z. Lulzim Basha.
Presidenti Meta i njohu të gjithë pjesëmarrësit në takim me situatën dramatike të sundimit të ligjit, dhe veçanërisht me zbatimin e njëanshëm antikushtetues të Reformës në Drejtësi.
Manipulimi i procesit të emërimeve të anëtarëve të Gjykatës Kushtetuese, duke synuar kapjen e Gjykatës Kushtetuese përmes rrëmbimit të të drejtës kushtetuese të Presidentit të Republikës për të bërë emërimet e tij, është skandali më flagrant i Reformës në Drejtësi dhe shkeljes së Kushtetutës.
Presidenti theksoi se nuk do të lejojë askënd të neutralizojë kompetencat e Presidentit të Republikës, siç ia njeh Kushtetuta e vendit, dhe se do të ndërmarrë çdo veprim për të ndaluar këtë puç kushtetues.
Kreu i Shtetit përshëndeti hapat e ndërmarra nga opozita për miratimin pa asnjë vonesë të reformës zgjedhore, si dhe qëndrimin publik të Opozitës së Bashkuar për zhvillimin e zgjedhjeve të parakohshme të menjëhershme, me qëllim kthimin e legjitimitetit të munguar Kuvendit të Shqipërisë dhe rivendosjes së dialogut politik në institucione.
Presidenti Meta vuri në dukje se përmbushja urgjente e kushteve të Bundestagut është e vetmja rrugë e sigurtë për çeljen sa më parë të negociatave të anëtarësimit me Bashkimin Europian, dhe për ndalimin e shpopullimit dramatik të vendit.
