Kryeministri maqedonas, Zoran Zaev, së bashku me liderin serb, Aleksandër Vuçiç dhe kreun e qeverisë malazeze, Milo Gjukanoviç, vizituan sot Durrësin, të shoqëruar nga kryeministri Edi Rama.
Ata takuan edhe disa nga familjet e prekura nga tërmeti i 26 nëntorit.
Në një postim në Facebook pas vizitës në Durrës, Zaev shprehu gatishmërinë për t’u ardhur në ndihmë familjeve të prekura nga tërmeti.
Më tej ai bëri me dije, se në Samitin e sotëm, pjesë e dokumentit që do të nënshkruhet, do të jetë edhe një pikë për bashkëpunimin rajonal në trajtimin e fatkeqësive natyrore dhe emergjencave.
“Si një shprehje solidariteti me qytetarët e Shqipërisë, dhe në mbështetje të frymës dhe mbështetjes së banorëve të qyteteve dhe vendbanimeve të tjera që pësuan dëme nga tërmeti i 26 nëntorit, së bashku me Kryeministrin e Shqipërisë dhe drejtuesit e tjerë të pranishëm në një takim në Tiranë, ne vizituam këtë mëngjes Durrësin. Ne u takuam me disa nga familjet që tani po rindërtojnë shtëpitë e tyre në vazhdën e fatkeqësisë tragjike, dhe riafirmuam gatishmërinë tonë për të vazhduar me mbështetje dhe ndihmë të mëtejshme në periudhën e rimëkëmbjes nga tërmeti. Me vizitën në Durrës, ne njoftuam bashkëpunimin tonë të përbashkët në trajtimin e fatkeqësive natyrore dhe emergjencave që do të përfshihen në dokument për integrimin më intensiv të rajonit që do të miratohet sot në Tiranë”, shkruan Zaev.
