Kryetari i Partisë Demokratike, Lulzim Basha ka reaguar me anë të një postimin në rrjetet sociale, menjëherë pas përfundimit të takimit të kryeministrit Rama me krerët e bashkive.
Basha me postimin e tij i ka kujtuar kryeministrit Rama se peshku qelbet nga koka. Basha shkruan se Rama mund të bëjë koka turku bedelët e tij, por se shqiptarët e dinë mirë se peshku qelbet nga koka. Gjithashtu në postimin e tij ai ka vendosur edhe një foto ku tregohet se Shqipëria renditet e dyta në botë për nivelin e ryshfetit, pra sipas tij 3 herë më i lartë se në 2013. “Mund të lash duart me një kryebashkiak të korruptuar apo të bësh koka turku bedelët e tu në atë sallë, por shqiptarët e dinë mirë se PESHKU QELBET NGA KOKA!”, shkruan kreu i Partisë Demokratike Lulzim Basha, teksa publikon tabelën ku Shqipëria renditet e dyta për nivelin e ryshfetit.
Kujtojmë se kryeministri i vendit Edi Rama, ditën e sotme zhvilloi një takim me kryebashkiakët në kryeministri ku dhe i paralajmëroi disa herë që të mos përzihen me prokurimet publike dhe të regjistrojnë tokën bujqësore duke iu thënë se nuk do të kenë mbrojtje nga qeveri, as nga Partia Socialiste, por as nga ai vetë.
