Ditën e sotme deputetja e Partisë Demokratike Jorida Tabaku thotë se është ndjerë e kërcënuar për nga mënyra se si Suella Braverman u është drejtuar shqiptarëve emigrant. Në një prononcim për mediat britanike, Tabaku thotë se ajo vetë ka studiuar në Mbretërinë e Bashkuar dhe si shqiptare është ndjerë e kërcënuar nga komentet e saj. Ndërsa, si politikane, Tabaku shton se kur ka një problem me një komunitet, duhet gjetur mënyra se si duhet trajtuar dhe nuk duhen sulmuar.
“Kam studiuar në Mbretërinë e Bashkuar dhe si shqiptare jam ndjerë shumë e kërcënuar nga komentet e saj. Si politikane, më vinte keq që komuniteti i mahnitshëm shqiptar po veçohej, sulmohej, ngacmohej vetëm sepse kishte një problem. Ne duhet të pranojmë se ka një problem që duhet trajtuar në të dyja mënyrat. Ka një problem në Britaninë e Madhe me sistemin që ekziston atje, por edhe në Shqipëri ka një problem sepse njerëzit po ikin. Sa më e lartë të jetë shkalla e largimit të njerëzve, duhet të na bëjë ne politikanët në Shqipëri të kuptojmë se duhet trajtuar nga brenda dhe jo vetëm ta lëmë fajin në anën e Britanisë së Madhe,”- tha Tabaku.
Reagimi i Tabakut vjen në një ditë kur kryeministri Edi Rama ndodhet në Londër ku dhe ka zhvilluar një takim me kryeministrin britanik Rishi Sunak. Rama ka deklaruar përballë Sunak se po bën gjithçka që të luftojë organizatat kriminale, por kërko igjithashtu që komuniteti shqiptar të ndihej mirë. Rama u shpreh se deklaratat e Braverman kundrejt shqiptarëve janë një krim.
