Deputetja e Partisë Socialiste, Luljeta Bozo ka komentuar së fundmi çështjen “Berisha”, në qoftë se duhet ose jo të jetë në Kuvend.
Në një intervistë për Euronews Albania, ku u pyet se si e shikonte kërkesën e artikuluar tashmë të ndërkombëtarëve për largim nga parlamenti të Sali Berishës, Bozo u shpreh se ishte pro shkuarjes së tij në Kuvend, pasi sipas saj Berishën e ka zgjedhur populli.
Bozo thotë se Berisha është i votuar nga populli dhe në qoftë se do të hyjë në Kuvend apo jo mbetet në dorë të tij dhe varet nga dëshira e tij.
“SHBA-të që kanë marrë atë vendim kanë pasur arsye shumë të forta, nuk e diskutoj fare, aq më tepër për një person që ka drejtuar për aq vite. Nëse hyn apo jo në parlament kjo varet nga dëshira e personit vet. Atë e ka votuar populli, ndaj nuk ka asnjë që ta pengojë të hyjë në parlament”, ka thënë Bozo.
Bozo më tej ka folur edhe për qëndrimet e saj për kohën e komunizmit, të cilat disa kohë më parë sollën reagime të shumta në publik. Ajo u shpreh se nuk heq dorë nga ajo që ka thënë më parë në lidhje me sistemin. Gjithashtu ajo ka renditur edhe tre anë negative që solli ky sistem duke përmendur mbylljen hermetike, e dyta ishte lufta pa mend e klasave, gabimi i tretë ishte lufta në ekonomi.
“Nuk ka sistem që i ka të gjitha gjërat e mira. Ai sistem, e kam thënë dhe nuk heq dorë, ka disa arritje të cilat shumë rrallë ose shumë vështirë mund t’i bëjë një vend si Shqipëria me një ekonomi të shkatërruar nga lufta.
Gjithë Shqipëria bregdetare ishte kënete, e gjeti Shqipërinë me një ekonomi as agrare, me 98 për qind analfabetë.
Në 1960, çdo 3 shqiptarë 1 ishte në shkollë, i dha një vrull shumë të madh zhvillimit të arsimit që krijon trurin. Bëri elektrifikimin, bëri vepra hidroenergjetike, bëri sistemin e vaditjes shumë modern. Kishte anë negative, që janë mbyllja hermetike, e dyta ishte lufta pa mend e klasave, gabimi i tretë ishte lufta në ekonomi; kur i morën fshatarit çdo gjë, kjo ishte katastrofa”, shprehet më tej Bozo.
