Kategoria Superiore mbylli javën e pestë të këtij edicioni të ri me dy sfida mjaft të bukura dhe emocionuese. Në takimin e zhvilluar në ‘Elbasan Arena’, Dinamo ka siguruar fitoren e parë në drejtimin e Ilir Dajës, teksa ka mundur jo pa vështirësi Skënderbeun në një ndeshje shumë të luftuar. Dinamo ishte menjëherë kërkuese dhe gjeti shpejt rrjetën me anë të Zabërgjës. Më pas blutë ulën ritmin e ndeshjes dhe u munduan që të gjenin të papërgatitur përsëri prapavijën e korçarëve, të cilët dhuruan pak në fazën ofensive.
Por pjesa e dytë nisi me shumë ritëm nga Skënderbeu që kërkoi dhe gjeti falë një penalltie golin e barazimit. Më pas rastet nuk munguan në të dy portat, por askush nuk dukej se kishte saktësinë për të çuar topin në rrjetë. Megjithatë në minutën e 90, pas një pavëmendje në prapavijën korçarë, Mandela i cili kishte qenë në hije gjatë ndeshjes, lëshoi një goditje të pakapshme për portierin Alia, duke siguruar fitoren 2-1 të Dinamos.
Në takimin tjetër, të zhvilluar në ‘Air Albania’, Tirana-Elbasani, emocionet ishin edhe më të mëdha, por në fund të dyja skuadrat duhej të kënaqeshin me vetëm një pikë. Ky duel ishte mjaft dramatic, pasi u mbyll me penalltinë e humbur nga Musta në minutën e 90+4’. Kola dhe Ze Gomesh ishin autorët e golave, ndërkohë që për Tiranën ky ishte barazimi i pestë radhazi në kampionat. Një ecuri për rekord kjo e bardhebluve për sa i përket barazimeve. Vlen të theksohet fakti se edhe pse ishte një përballje e luftuar, gjyqtari nuk ndëshkoi asnjë futbollist me karton të verdhë. I vetmi i ndëshkuar i sfidës ishte drejtori sportiv i Tiranës, Agim Ibrahimi. Në duelin e radhë Tirana do të përballet në derbi me Partizanin, ndërsa Elbasani pret Egnatian.
