Prokuroria e Krimeve të Rënda në kuadër të hetimeve të grabitjes së ndodhur në aeroportin e Rinasit më 9 prill, po kryen verifikime edhe për 20 zyrtarë të Autoritetit të Aviacionit Civil dhe TIA.
Burimet e “abcnews” thonë se përveç ICTS-së, edhe zyrtarë të këtyre dy institucioneve mund të kenë kryer shpërdorim detyre. Sipas organit të akuzës, nga ICTS dhe TIA nuk kanë kryer kontrolle tremujorshe për parametrat e sigurisë në aeroport.
Hetimet për zyrtarët e këtyre institucioneve nisi pas këqyrjes së pamjeve të kamerave të sigurisë dhe të dokumentacionit për kontrollin periodik të sigurisë së aeroporti të Rinasit.
Po ashtu, bëhet me dije se dhe pas konstatimit të problematikave, nuk janë marrë masat e nevojshme.
Hetimet kanë nisur dhe për zinxhirin komandues të Kompanisë së sigurisë ICTS. Vepra që po hetohet deri më tani është ajo e “Shpërdorimi të detyrës”.
Dhe pse Prokuroria e Krimeve të Rënda nuk ka dhënë urdhër ndalimi për asnjë nga zyrtarët e lartë të ICTS, TIA dhe Aviacionit Civil, aktualisht ka nisur verifikimi i 20 personave.
Alkon Bengasi i cili bëri modifikimin e furgonit që u përdor në grabitje, pranoi të bashkëpunonte me drejtësinë duke rrëfyer gjithçka dinte për autorët dhe grabitjen
Në lidhje me grabitjen, aktualisht janë arrestuar 6 persona, ndërsa 5 persona të tjerë vijojnë të jenë ende në kërkim.
