Krimi Ekonomik ka vënë në pranga 13 persona, ndërsa 12 të tjerë janë shpallur në kërkim, pas akuzës për evazion fiskal me TVSH-në. Në lidhje me këtë ngjarje, ka reaguar edhe kreu i qeverisë, Edi Rama.
Në një postim në Twitter, Rama u ka bërë thirrje të gjithë bizneseve që të mos “luajnë me taksën sepse do t’i gjejë belaja”.
“Ulja e taksave e lehtësimi tërësor i biznesit, synojnë dhe uljen e informalitetit dhe evazionit fiskal! Arrestimi i një duzine shkelësish dhe shpallja në kërkim e një tufe tjetër nga biznesi i madh,për mashtrim me taksat, është mesazh i qartë: Mos luani me taksat se ju gjen belaja”, ka shkruar Rama.
Sot në mengjes, Prokuroria lëshoi 25 urdhër ndalime për 25 persona që figurojnë administratorë të subjekteve të dyshura fiktive që kanë lëshuar fatura të falsifikuara, duke i shkaktuar shtetit një dëm prej 18 miliardë lekësh.
