Sot në Gjykatën Themelore të Prishtinës pritet të zhvillohet seanca e radhës për çështjen “Banjska”, që lidhet me ngjarjet e 24 shtatorit 2023 në veri të Kosovës, ku mbeti i vrarë rreshteri i Policisë, Afrim Bunjaku.
Avokati i familjes së tij, Arianit Koci, e cilësoi këtë proces si një ndër më të rëndësishmit në historinë e pasluftës së Kosovës.
“Këtë javë zhvillohet një nga gjykimet më të rëndësishme në Kosovën e pasluftës: procesi ndaj personave të akuzuar për sulmin terrorist në Banjska, ku heroikisht humbi jetën polici Afrim Bunjaku duke mbrojtur integritetin territorial të Kosovës,” shkroi Koci në rrjete sociale.
Në seancën e fundit, të akuzuarit Blagoje Spasojeviq, Vladimir Toliq dhe Dushan Maksimoviq u deklaruan të pafajshëm për akuzat që përfshijnë terrorizëm dhe krime kundër sigurisë së shtetit.
Ata janë pjesë e një grupi prej 45 personash të akuzuar nga Prokuroria Speciale më 11 shtator 2024.
Në qendër të dosjes është Milan Radoiçiq, ish-nënkryetar i Listës Serbe, i cili ka marrë publikisht përgjegjësinë për organizimin e sulmit të armatosur në fshatin Banjskë të Zveçanit.
Radoiçiq dhe 41 të tjerë janë në arrati, me urdhër-arreste ndërkombëtare të lëshuara nga INTERPOL, ndërsa autoritetet kosovare vijojnë përpjekjet për ekstradimin e tyre nga Serbia.
Aktakuza ngarkon të pandehurit me vepra të rënda si terrorizëm, financim të terrorizmit dhe cenim të rendit kushtetues të Republikës së Kosovës.
