Një muaj pas sulmit të dhunshëm ndaj blogeres Klea Prenga, eksperti i kriminalistikës Artan Rexhepi ka ngritur shqetësime serioze për mënyrën se si po trajtohet rasti. Sulmi, i kryer nga motrat Berisha në një nga lokalet më luksoze të Tiranës, në lagjen Kodra e Diellit, ka lënë pasoja të rënda për Prengën.
Rexhepi thekson: “Shoh një tendencë për ta zbutur situatën, përderisa nuk po kapen. Ngjarja mori bujë sepse është shumë e rëndë, imagjinoni një femër që të godet me gotë. Një femër që godet një femër me gotë, e dini sa e frikshme është. Ajo është send që kthehet në thikë.”
Eksperti shpreh shqetësimin se rasti mund të degradohet në një akuzë më të lehtë: “Do pritet të rehabilitohet pak vajza dhe mendoj se do dali plagosje e lehtë dhe do kaloj në nivel rrahjesh që ndiqet kryesisht.”
Pasojat për Klea Prengën janë serioze. Babai i saj ka konfirmuar për mediat se e bija ka pësuar dëmtime të nervave të buzëve, çka i shkakton vështirësi në të folur për shkak të paralizës së buzës së sipërme.
Ndërkohë, hetimi për gjetjen e motrave Berisha vazhdon. Burime raportojnë se ato janë larguar nga Shqipëria përmes pikës kufitare të Morinës, ku nuk ka kontrolle pasaportash. Dyshohet se motrat mund të ndodhen aktualisht në Dubai, megjithëse policia nuk i ka sinjalizuar ende zyrtarisht.
Rexhepi komenton edhe për mundësinë e gjetjes së tyre: “Nëse kanë dalë nga Morina nuk na ndalon njeri që t’i shkruajmë Kosovës, për ku ka ikur ku ka fluturuar.”
Ky incident, i motivuar nga xhelozia, ka tronditur opinionin publik dhe ka ngritur pyetje për sigurinë në vendet e frekuentuara nga të rinjtë. Ndërsa hetimi vazhdon, mbetet për t’u parë se si do të zhvillohet më tej çështja dhe nëse do të arrihet drejtësia për Klea Prengën.
