Shoqata e gazetarëve, misioni i Organizatës për Siguri dhe Bashkëpunim në Evropë dhe udhëheqës institucionesh e partish politike, u bënë thirrje institucioneve të Kosovës për hetimin e shpejtë dhe vënien para drejtësisë të përgjegjësve, që qëlluan më armë zjarri mbi makinën e gazetarit Shkumbin Kajtazi.
Asociacioni i Gazetarëve të Kosovës e dënoi ashpër sulmin, duke e cilësuar atë “tejet shqetësues dhe rëndon jo vetëm klimën e të bërit gazetari, por rrezikon edhe jetën e kolegëve tanë. AGK fton organet kompetente që ta hetojnë sa më shpejtë këtë rast, në mënyrë që personat që kanë kryer këtë akt të dalin para drejtësisë”.
Në deklaratën e shoqatës thuhet se “është shqetësues fakti se si brenda një periudhe prej katër muajsh kanë ndodhur dy sulme në drejtim të gazetarit, Shkumbin Kajtazi. Secili sulm në drejtim të gazetarëve është sulm ndaj interesit publik dhe demokracisë në vend”.
Kajtazi nga gazeta Reporteri.net, bëri me dije mbrëmjen e së se makina e tij u qëllua me armë zjarri në qendër të Mitrovicës.
Policia nga ana e saj tha se heton rastin, por ende nuk ka informacion lidhur me personat që mund të fshihen pas sulmit apo motivet e tyre.
Ndërsa Kryeministri i Kosovës, Avdullah Hoti shprehu shqetësimin e tij për sulmin.
“Liria e medias dhe liria e shprehjes janë të garantuara me ligj dhe do të mbrohen në secilën rrethanë. Prandaj, kërkoj nga organet e rendit që ta trajtojnë rastin e Shkumbinit me prioritet të lartë dhe t’i zbardhin rrethanat e sulmit. Sulmet ndaj gazetarëve dhe mediave janë sulme direkte ndaj vlerave demokratike, prandaj edhe do të trajtohen me prioritet nga organet e rendit në Republikën e Kosovës”, komentoi kryeministri Hoti nëpërmjet një postimi në Facebook.
/GazetaReforma.com/
