Britania ka reaguar lidhur me sulmin me bombë e me predha ndaj një anijeje britanike nga Rusia, në Detin e Zi. Me anë të një deklarate zyrtare Britania e Madhe ka mohuar se Rusia ka kryer të shtëna paralajmëruese në drejtim të luftanijes së saj. Ministria Britanike e Mbrojtjes në njoftimin zyrtar tha se “nuk ka pasur të shtëna paralajmëruese ndaj HMS Defender”.
Gjithashtu ajo ka qartësuar ngjarjen duke thënë se anija po lundronte në ujërat e Ukrainës, dhe se rusët po kryenin stërvitje të armatosura në Detin e Zi. Ministria e Mbrojtjes ndër të tjera ka sqaruar se Rusia ka bërë paralajmërim paraprak për aktivitetin e tyre.
Nga ana tjetër Rusia pretendon se, pas të shtënave, anija britanike e ka ndryshuar drejtimin. Gjithashtu në bazë të raportimeve nga Rusia, anija e patrullimit qëlloi dy herë, ndërsa avioni Su24-M ka shkrepur katër bomba.
Agjencia ruse e lajmeve Interfax raportoi se për shkak të incidentit atasheu i mbrojtjes i ambasadës britanike është thirrur në ministrinë ruse të mbrojtjes.
Gjithashtu nga njoftimi zyrtar në faqen e Marinës Mbretërore bëhet me dije se anija britanike HMS Defender po kryen misione në Detin e Zi.
Kujtojmë se më parë u raportua se një incidenti ndodhi në jug të Krimesë ku sipas rusëve anija britanike ndryshoi papritur kursin duke u futur në ujërat e Rusisë. Pas kësaj, një avion rus SU24-M lëshoi katër bomba pranë anijes britanike, ndërsa anija patrulluese ruse po ashtu qëlloi pranë britanikëve. Por Ministria e Brendëshme Britanike e mohoi.
