Izmir Sakica dhe Samuel Troshani do të dalin sot për herë të parë para Gjykatës së Posaçme të Apelit, ku do të kërkojnë ndryshimin e masës së sigurisë “arrest në burg”, të caktuar ndaj tyre për sulmin me armë ndaj vëllezërve Prendi në Bushat.
Dy të rinjtë, të cilët ndodhen në qeli që prej 22 janarit, synojnë të zbutin masën e sigurisë, pasi Gjykata e Shkallës së Parë i la në burg.
Ndërkohë, për të njëjtën ngjarje, vijojnë të jenë në kërkim Franko Leka dhe Aleksandër Prendi. Ata dhe të tjerët e përfshirë në sulm përballen me akuzën e grupit të strukturuar kriminal.
Sipas SPAK, Sakica, Troshani dhe Leka, së bashku me disa persona të tjerë ende të paidentifikuar, të armatosur dhe me makina të blinduara, janë nisur drejt Bushatit me qëllimin për të vrarë anëtarë të familjes Prendi.
Por sapo kanë mbërritur në zonë, Aleksandër Prendi i ka pikasur dhe ka qëlluar mbi ta. Në vendngjarje janë gjetur gëzhoja të shumta, duke konfirmuar shkëmbimin e zjarrit mes grupeve.
Megjithëse kanë kaluar disa muaj nga ngjarja, motivi i konfliktit mbetet ende i paqartë.
