Ish-kryeministri, Sali Berisha iu është bashkuar reagimeve që ka shkaktuar sulmi i ndodhur në veri të Kosovës në orët e para të mëngjesit të sotëm.
Përmes një mesazhi në “Facebook’ Berisha thekson se sulmi është porositur nga bandat e Beogradit dhe presidenti serb Aleksandër Vuçiç. Sipas tij, Vuçiç kërkon që të provokojë konfliktin dhe destabilizim.
“Sulmet kriminale te bandave te Beogradit urdhërohen nga serbomadhi Vuçiç! Te dashur miq, pas agresionit barbar rus ndaj Ukraines, Beogradi ka organizuar falanga banditesh dhe ka ndermarre me to ne menyre te perseritur sulme kriminale dhe terroriste ndaj patrullave te policise se Kosoves ne veriun e vendit.
Me keto sulme te Vuçiç kerkon te provokoje konflikt dhe destabilizim dhe te vazhdoje keshtu projektin e tij te Serbomadhise.
Denoj me ashpersine me te madhe keto akte te perseritura kriminale ndaj policise se Kosoves dhe kerkoj nderprerjen e tyre te menjehershme. Sb”, shkruan Berisha.
Kujtojmë se edhe paraditen e sotme ka pasur një sulm të ri ndaj policisë në veri të Kosovës.
Policia konfirmon se në orët e hershme të mëngjesit është sulmuar një njësi patrulluese kufitare, në fshatin Zupçe të Zubin Potokut.
Përveç dëmeve materiale në automjete, nuk raportohet për të lënduar.
Në vendngjarje kanë mbërritur më shumë forca policore për të monitoruar situatën. Policia e Kosovës dhe organet e drejtësisë po e hetojnë rastin më në thellësi.
Sulme të ngjashme ndaj policisë në veri të Kosovës kanë ndodhur edhe javët e kaluara, ku ndonjëherë kanë qenë të përditshme.
Sulmet e mëparshme në veri në Mitrovicës, kryeministri i Kosovës Kurti i ka cilësuar “sulme terroriste që donin të vrisnin policët”.
