Rrjeti “SafeJournalist” ka ngritur shqetësime në lidhje me një fushatë denigruese ndaj gazetares Ola Xama, e cila është një denoncuese e aferave të qeverisë. Sipas “SafeJournalist”, e përditshmja “DITA” dhe portali “Prapaskena” po udhëheqin këtë fushatë kundër gazetares.
“’SafeJournalist’ shpreh shqetësim të thellë dhe zhgënjim mbi vijimin dhe intensifikimin e fushatës së shpifjeve kundër gazetares Ola Xama, një gazetare investigative në Shqipëri,” shkruhet në deklaratën e shpërndarë sot.
Kjo nuk është hera e parë që gazetarja përballet me një ‘sulm’ të tillë kundër saj, pasi verën e kaluar një fushatë e ngjashme u bë kundër saj nga këto dy media, për të cilën Ola Xama ngriti dhe një padi. Sulmi ndaj saj erdhi pas publikimit të një investigimi që Xama bëri në lidhje me rolin e kryetarit të Bashkisë së Tiranës, Erion Veliaj, në aferën e inceneratorit të Tiranës. Kujtojmë që Veliaj i dërgoi edhe një mesazh gazetares duke e shpallur atë “vrasëse me pagesë” dhe “militante”, një terminologji që u shumëfishua nga portale të ndryshme “online” dhe nga gazeta “DITA” për ditë të tëra
“Në një seri të re artikujsh në platformat si gazeta e përditshme ‘DITA’ dhe ‘Prapaskena’, Xama është sulmuar si ‘e përdalë’, ndërsa ekspozimi i adresës së saj private dhe sulmet ndaj familjarëve të saj janë jo vetëm të dënueshme, por edhe një përpjekje e hapur për ta frikësuar dhe për ta shtyrë atë drejt heshtjes. Të dyja mediat janë paditur për shpifje nga gazetarja pas një fushate të ngjashme të ndërmarrë verën e kaluar, në vijimësi të publikimit të një investigimi që Xama bëri në lidhje me rolin e kryetarit të Bashkisë së Tiranës, Erion Veliaj, në aferën e inceneratorit të Tiranës. “Ne u bëjmë thirrje të gjithë aktorëve të na bashkohen në mbrojtjen e të drejtave të grave gazetare dhe në promovimin e një panorame mediatike në të cilën gazetaret të mund të punojnë pa frikë për sulme apo diskriminim”, thuhet më tej në deklaratë.
