Një ngjarje e rëndë është regjistruar mëngjesin e sotëm në një shkollë në rajonin Nordviertel të landit Hesse, në shtetin gjerman të North Rhine-Westfalia. Sipas raportimeve të gazetës gjermane Bild, një mësues është sulmuar me thikë nga një 18-vjeçar shqiptar nga Kosova dhe ka mbetur rëndë i plagosur.
Mësuesi është goditur në zonën e stomakut dhe ndodhet në gjendje kritike. Ai është transportuar me urgjencë në spital, ku pritet t’i nënshtrohet një operacioni kirurgjikal. Po ashtu, raportohet se edhe nxënësi i përfshirë në incident ka marrë plagë të rënda.
Forcat speciale gjermane (SEK – Spezialeinsatzkommando) janë dislokuar në zonë menjëherë pas ngjarjes. Shkolla është evakuuar, ndërsa perimetri përreth është bllokuar për të siguruar rendin dhe për të mos lejuar hyrje-dalje të paautorizuara.
Autori i sulmit ndodhet ende në arrati dhe identiteti i tij nuk është bërë publik nga autoritetet gjermane. Ende nuk dihet nëse ai ka pasur lidhje personale me viktimat apo nëse ishte pjesë e shkollës. Policia nuk përjashton mundësinë që të ketë pasur tentativa për të sulmuar edhe persona të tjerë, por këto të dhëna nuk janë konfirmuar zyrtarisht.
Zyrtarë të policisë gjermane kanë paralajmëruar se në orët e ardhshme do të zhvillohet një konferencë për shtyp, ku do të jepen më shumë detaje mbi rrethanat e sulmit, gjendjen e të plagosurve dhe hetimet në vijim.
