Policia suedeze ka nisur hetimet për motivin e sulmit masiv më vdekjeprurës në vend, i cili ndodhi të martën në Orebro.
11 persona humbën jetën, përfshirë sulmuesin, ndërsa gjashtë të tjerë u plagosën.
Mediat lokale kanë raportuar se i dyshuari për këtë ngjarje është 35-vjeçari Rickard Andersson, një ish-nxënës i shkollës së të rriturve Risbergska, ku ndodhi ngjarja tragjike.
Në një deklaratë, mbreti Carl XVI Gustaf shprehu trishtimin për këtë ngjarje, duke thënë: “E gjithë Suedia është në zi”. Autoritetet ende nuk kanë dhënë detaje të plota mbi viktimat dhe të plagosurit, por zyrtarët shëndetësorë kanë njoftuar se tre gra dhe dy burra janë në gjendje kritike, ndërsa një grua ka marrë trajtim për lëndime të lehta.
Policia ka konfirmuar vdekjen e sulmuesit dhe ka dyshime se ai mund të ketë vrarë veten pas një shkëmbimi zjarri me policinë. Sipas raporteve, sulmuesi nuk kishte lidhje me bandat dhe nuk kishte ndjekur mësime që nga viti 2021. Po ashtu, nuk ka prova që sugjerojnë se motivi i sulmit ishte ideologjik ose terrorist.
Sa i përket armës së përdorur, disa burime kanë raportuar se mund të ketë qenë një armë gjuetie, ndërsa të tjerë flasin për një armë automatike.
Policia ka bërë të ditur se arma ishte marrë në mënyrë legale. Hetimet po vazhdojnë dhe autoritetet janë duke u përpjekur të zbardhin plotësisht ngjarjen dhe të kuptojnë motivet e sulmit.
