Mijëra qytetarë dhe studentë protestuan njëkohësisht në mbi 30 qytete të Serbisë, duke i drejtuar një ultimatum presidentit Aleksandër Vuçiç: ose shpall zgjedhje të parakohshme, ose përgatitu për një valë të re mosbindjeje civile në të gjithë vendin.
Protesta u zhvillua të dielën në mbrëmje, rreth orës 20:00, me një fjalim të njëjtë që u lexua në çdo qytet. Në mesazhin e përbashkët, studentët paralajmëruan se do të fillojnë mosbindje civile në të gjitha qytetet serbe. “Nuk do të ndërhyjmë në punët e qytetarëve, por në gënjeshtra, padrejtësi dhe korrupsion,” deklaruan ata.
Studentët kujtuan se lëvizja e tyre ka nisur më shumë se gjashtë muaj më parë, duke u përshkruar si vala më e madhe e demonstratave studentore në Evropë në 50 vitet e fundit. Ata theksuan se kanë udhëtuar në çdo cep të Serbisë për të përhapur mesazhin e shpresës dhe drejtësisë, duke organizuar tubimet më të mëdha në historinë e vendit.
“Ne i dhamë shpresë vetes dhe të tjerëve për një të ardhme më të drejtë. Zgjimi i ndërgjegjes shoqërore dhe mbështetja për komunitetin akademik janë vlerat që po mbrojmë,” thuhej në fjalim.
Në qendër të kërkesave të tyre qëndron thirrja për zgjedhje të jashtëzakonshme parlamentare, të cilat studentët i konsiderojnë si mënyrën e vetme për të rikthyer legjitimitetin dhe përfaqësimin demokratik. Ata e quajtën këtë moment “pikë kthese për Serbinë”, ku zëri i të rinjve nuk është më një zhurmë, por një forcë që kërkon ndryshim real.
Studentët theksuan gjithashtu se nuk kanë marrë asnjë përgjigje institucionale për kërkesat e tyre legjitime, përkundrazi janë përballur me dhunë, kërcënime dhe represion. “Na është përgjigjur me fyerje, arrestime dhe gaz lotsjellës,” thanë ata, duke akuzuar qeverinë për mungesë të vullnetit politik për të ndryshuar.
Ata u zotuan se do të vazhdojnë me aksionet e mosbindjes civile përpara institucioneve shtetërore, ministrive dhe mediave që, sipas tyre, përpiqen të heshtin zërin e qytetarëve.
“Protesta jonë nuk është thjesht studentore. Është protestë e arsyes dhe dinjitetit. Është zëri i çdo qytetari që është injoruar, por nuk ka humbur shpresën,” thuhej në fjalim, duke ftuar të gjithë qytetarët që të bashkohen në këtë lëvizje për drejtësi dhe llogaridhënie.
Në fund, ata bënë thirrje për unitet: “Mos luftoni për ne, por me ne. Derisa kërkesat të përmbushen.”
