Studentët e kryeqytetit edhe sot kanë nisur protestën sipas planifikimit që kishin bërë. Ndryshe nga ditët e tjera , sot kanë kërkuar vet që studentët nga rrethet të bashkohen në Tiranë për të protestuar përpara Ministrisë së Arsimit për qëllimet e tyre të përbashkëta.
Për këtë arsye,studentët e Shkodrës, Elbasanit, Vlorës, Korçës dhe ato të Gjirokastrës i janë përgjigjur pozitivisht duke u nisur që në orët e mëngjesit drejt kryeqytetit.
Të bindur që do i shkojnë deri në fund, studentët e Shkodrës janë gati të rikthehen në qytetin e tyre për të rinisur protestën ditën e hënë, deri në plotësim të kërkesave të tyre.
Por ditën e sotme, protesta e studentëve është shoqëruar me përplasje dhe tensione kur pedagogu Jani Marka, ka tentuar të marrë fjalën për të folur.
Në atë moment është larguar nga studentët me forcë pasi ai i përket “Lëvizjes për Universitetin” dhe sipas tyre kjo lëvizje është politike.
Studentët shprehen se pedagogu është përfaqësues i lëvizjes komuniste dhe që ata nuk duan as politikë, as për përçarës në protestë.
“U godita me grushte. U ushtrua dhunë ndaj nesh. Janë dhunuar edhe aktivistet tona. Unë doja të flisja kundër dhunës dhe në atë moment… Imagjino mund të ushtrojnë studentët dhunë? Ne pedagogë dhe studentë jemi bashkë. Kam vite që protestoj për të drejtat e studentëve dhe Universitetin. Do shikoni kush janë njerëzit dhe ata që marrin zjarr këtu. Më larguan sepse janë të dhunshëm. PD të tërheqë eksponentët e dhunshëm nga protesta. Jam me studentët, nuk kam lidhje me politikën. Një grup i dhunshëm ka zaptuar protestën. Kauza e pedagogëve e përbashkët me studentët. Bëj thirrje që të mos ketë dhunë. Na akuzojnë për përçarje, por do ta merrni vesh ku janë. Forumet partiake po përçajnë protestën, por ne do i demaskojmë. Janë këtu forumet e tyre, partitë”- tha pedagogu gjatë një prononcimi për “BalkanWeb”.
