Zbardhen detaje të reja nga operacioni i përbashkët mes SPAK dhe antimafias italiane të Barit, ku u ekzekutuan 52 urdhër-arreste në kuadër të hetimit të koduar “Ura”.
Një nga emrat kryesorë që del në skemën kriminale të ngritur nga autoritetet është Adi Çoba, pronar i kompanisë “Felix Vinum”, i identifikuar si një nga drejtuesit e trafikut ndërkombëtar të narkotikëve, në bashkëpunim të ngushtë me Elvis Doçin.
Sipas dosjes hetimore të autoriteteve italiane, Çoba ka luajtur një rol qendror në organizimin e transportit të lëndëve narkotike drejt Italisë.
Ai akuzohet se ka menaxhuar rrjetin e korrierëve që udhëtonin nga Shqipëria dhe Holanda drejt portit italian, duke transportuar sasi të konsiderueshme heroine dhe kokainë.
Grupi kriminal, sipas hetimeve, ishte i strukturuar mirë dhe çdo anëtar kishte detyra të qarta, nga pritja dhe ruajtja e drogës në Shqipëri dhe Holandë, te shpërndarja dhe pagesat në Itali.
Pjesë e dosjes janë dhe komunikime të përgjuara mes Adi Çobës dhe të pandehurve të tjerë, përfshirë edhe Elvis Doçin, i cilësuar nga i penduari i drejtësisë Nuredin Dumani si një “negociator i shkëlqyer” në çështjet e trafikut.
Nga hetimet rezulton se grupi me bazë në Durrës ushtronte veprimtarinë e furnizimit të disa organizatave të tjera kriminale italiane me drogë, duke u kthyer në një hallkë të rëndësishme të trafikimit.
Paratë e përfituara nga kjo veprimtari e paligjshme transportoheshin drejt Shqipërisë në mënyrë të vazhdueshme, disa herë në javë, përmes linjave të rregullta të autobusëve, e më pas investoheshin në pasuri të paluajtshme.
Nën hetim për pastrim parash është vënë edhe Nexhmedin Danaj, pronari i “Vlora Cable”, për të cilin SPAK dyshon se ka kryer transferta të paligjshme të shumave të mëdha parash, që lidhen me aktivitetin kriminal të grupit. Për të, është firmosur një urdhër ndalimi.
Hetimet vijojnë në të dy vendet për të dokumentuar rrjetin e plotë të përfshirë në këtë skemë trafiku dhe pastrimi parash.
