Të paktën 30 persona janë lënduar nga përplasja e dy tramvajeve pranë stacionit hekurudhor në Strasburg, Francë. Ende nuk dihen rrethanat e sakta të aksidentit.
Sipas një reporteri të AFP-së, zona është rrethuar nga policia dhe në vendngjarje ndodhen shumë automjete të emergjencës.
Një video e publikuar nga një dëshmitar në rrjetet sociale tregon dy tramvaje të dëmtuar rëndë dhe një skenë kaotike në një tunel, ku njëri prej tramvajeve ka dalë nga shinat pas përplasjes.
Strasburgu, qyteti i parë i madh në Francë që riktheu tramvajet në përdorim në vitin 1994, nuk kishte përjetuar një aksident të madh deri më tani. Hetimet për të zbardhur shkaqet e aksidentit po vazhdojnë.
