Ka nisur sot stadiumin Air Albania procesi i vaksinimit të personave të parë anti-COVID! Ashtu siç kishte paralajmëruar Kryeministri Rama, e para është vaksinuar drejtoresha e Infektivit, Najada Çomo. I dyti është vaksinuar Kryeministri Rama.
Ka përfunduar gjithashtu vaksinimi për mjekët Tritan Kalo dhe Pëllumb Pipero.
11 janari i 2021 do të jetë një ditë shumë e rëndësishme për vendin në rrugën për t’i dhënë fund betejës disa mujore me COVID-19. Procesi ka nisur sot në orën 15:00.
Nje javë më parë Kryeministri Rama dhe ministrja e Shendetësisë, Ogerta Manastirliu vizituan qendrën e vaksinimit në stadiumin Air Albania dhe deklaruan se janë siguruar 500 mijë doza vaksine nga Pfizer dhe njëkohësisht ka marrëveshje për një trend vaksinash që i përgjigjen planit të kalendarizuar.
“Në të gjitha rastet ne fillojmë në javën e tretë të janarit. Por le të shpresojmë që do të fillojmë më shpejt. Jemi në komunikime nga të katër anët. Dhe kemi besim se do të mund të fillojmë dhe më shpejt falë disa kanaleve preferenciale që kemi hapur. Jemi në një fazë realisht shumë pozitive përsa i përket perspektivës të kësaj nisme. Kemi siguruar 500 mijë vaksina dhe njëkohësisht kemi garantuar një trend vaksinimi, që i përgjigjet strategjisë dhe që janë të kalendarizuara. Nga fillimi deri sot ne nuk jemi asnjëherë një hap pas asaj që vjen, por jemi gjithmonë një hap përpara”, tha Kryeministri Edi Rama. Por dje, pa pritur të kalonin tri javë, Rama njoftoi se do të niste sot vaksinimi.
Sipas ministres Manastirliu, janë marrë masat për të gjithë elementët e sigurisë. “Do të kemi skuadrat e vaksinatorëve, të mjekëve si dhe të koordinatorëve që do të lehtësojnë këtë proces”, tha ministrja. ” Planifikojmë që çdo një orë të vaksinohen 60, ndoshta diçka më shumë qytetarë. Dhe do të vijojmë kështu 8-10 orë në ditë. Sigurisht që vaksinat e para që do të vijnë i dedikohen sipas planit tonë të vaksinimit grupeve të riskut”, nënvizoi Manastirliu.
/Gazetareforma.com/
