Keir Starmer do të vizitojë sot Shqipërinë, duke u bërë Kryeministri i parë britanik që viziton vendin.
Mediat britanike, përfshirë “The Sun”, raportojnë se qëllimi i vizitës nuk është vetëm simbolik, Starmer pritet të diskutojë me autoritetet shqiptare për mundësinë e një marrëveshjeje të re për emigrantët, pavarësisht se qeveria britanike ka hequr dorë nga skema për Ruandën.
Sipas burimeve të “The Sun”, zyrtarë britanikë kanë përgatitur plane për të zhvendosur emigrantë në Shqipëri për përpunim të aplikimeve, në një model të ngjashëm me atë të Italisë.
Vjet, Kryeministrja italiane Giorgia Meloni deklaroi se Starmer kishte shprehur interes për një marrëveshje të ngjashme me atë mes Italisë dhe Shqipërisë.
Artikulli i “The Sun”:
Sir Keir Starmer do të zhvillojë bisedime me Shqipërinë mes thirrjeve të reja për të dërguar emigrantët e paligjshëm jashtë vendit. Pavarësisht se e anuloi skemën për Ruandën, zyrtarët britanikë kanë hartuar plane për të dërguar emigrantët në shtetin ballkanik. Vitin e kaluar, kryeministrja italiane Giorgia Meloni tha se kryeministri britanik ishte “shumë i interesuar” për një marrëveshje si ajo ku Italia deporton emigrantët në Shqipëri për përpunim.
Sir Keir ka deklaruar se do të shqyrtojë çdo opsion për të ndaluar fluksin e paligjshëm duke dekurajuar emigrantët që të kalojnë Kanalin. Megjithatë, marrëveshja italiane është penguar nga sfida ligjore, me Mbretërinë e Bashkuar që po ndjek nga afër përfundimin e saj. Kryeministri ndodhet në kryeqytetin shqiptar përpara një samiti evropian që do të mbahet nesër në Tiranë. Kjo është vizita e parë në Shqipëri nga një kryeministër britanik.
Sir Keir shpreson të rrisë bashkëpunimin me Shqipërinë, nga e cila vijnë një numër i konsiderueshëm emigrantësh në Britani me gomone. Vizita ndodh në një javë të ngarkuar kalimesh, ku mbërritjet nga Franca kanë arritur në 12.699 deri tani këtë vit — 30 përqind më shumë se në të njëjtën periudhë të vitit të kaluar. Sir Keir dhe homologu i tij shqiptar Edi Rama do të shpallin masa për të goditur trafikun e qenieve njerëzore, përfshirë përdorimin e dronëve britanikë për të monitoruar kriminelët që kalojnë emigrantë përmes rajonit.
