Disa pjesëtarë të stafit të shkollës 9-vjeçare ‘Koto Hoxhi’ në Gjirokastër janë infektuar me COVID-19, ndaj ISHSH ka vendosur që kjo shkollë të mbyllet përkohësisht.
Mësimi në këtë shkollë do të vijojë online, ndërkohë që për shkak të COVID është mbyllur edhe kopshti “Cicërimat”.
“Në shkollën tonë disa mësuese kanë rezultuar pozitiv me Covid 19 dhe një pjesë tjetër janë në pritje të përgjigjes, pasi kanë bërë tamponin. Në klasa, një numër i konsiderueshëm nxënësish vijnë nga familje, ku kanë familjarë pozitiv ndaj Covid 19.
Ditën e hënë, ambjentet e shkollës do të dezinfektohen. Për këto arsye, nga ana ime si drejtues i shkollës u kërkua zhvillimi i mësimit në distancë (online) duke filluar nga dita e hënë deri në një njoftim të dytë”, thuhet në njoftimin e shpërndarë nxënësve të shkollës.
Në Gjirokastër janë 256 raste aktive me COVID-19, ndërsa që nga fillimi i pandemisë në vendin tonë janë regjistruar 24.206 raste me koronavirus, nga të cilët 559 kanë humbur jetën./GazetaReforma.com/
