Mbrëmjen e sotme emisioni “Fiks Fare” ka denoncuar një problematike në qytetin e Shkodrës ku mbetjet spitalore e spitalit rajonal qendrojnë brenda rrethimit të tij në kushte të papërshtatshme.
Pajisja e përpunimit është e prishur dhe landifilli i Bushatit nuk i pranon më këto mbetje spitalore të papërpunuara. Kjo gjë ka bërë që spitali të kthehet në një pikë grumbullimi mbetjesh spitalore të cilat i prodhon vetë.
Në kërkimet e bëra, është zbuluar se ky spital për përpunimin e mbetjeve anatomike ka një kontratë me një subjekt që është i licencuar për përpunimin e mbetjeve spitalore. Kurse të gjitha mbetjet e tjera infektive duhet që spitali t’i përpunojë vetë me autoklavë, e cila nuk punon prej më shumë se 8 muajsh.
Drejtori i Spitalit të Shkodër ka theksuar se ka pak ditë në këtë post, por që është në dijeni me problemin që ka spitali me mbetjet spitalore. Ai shpjegon se kanë një kontratë me kompaninë Rozafa që mbledh mbetje urbane dhe i depoziton në landfill dhe hera e fundit që kjo kompani ka marrë mbetjet nga ky spital ka qenë para tre javësh. Por, kjo bie ndesh me atë çka drejtues të landfillit i treguan gazetarëve, që nuk kanë pranuar më mbetje që para 4 muajve.
Versionin e drejtorit e hedh poshtë administratori i kompanisë Rozafa, i cili i kontaktuar në telefon shprehet se ka mbi 3-4 muaj që nuk merr mbetje në spital, pasi ato nuk janë mbetje urbane, por spitalore.
