Pas publikimit të raportit nga Zyra Evropiane Kundër Mashtrimit (OLAF), i cili zbuloi keqpërdorimin e fondeve të BE-së nga Instrumenti për Asistencën e Para-Aderimit për Zhvillimin Rural (IPARD II) në Shqipëri, Partia Demokratike (PD) ka akuzuar qeverinë për abuzim me fondet e BE-së. Deputeti i PD-së, Gazment Bardhi, ka kërkuar një mocion me debat në Kuvend dhe një komision të posaçëm për të hetuar akuzat.
Bardhi theksoi se raporti i OLAF zbuloi shkelje serioze dhe abuzime me fondet e destinuara për zhvillimin rural, duke dëmtuar reputacionin e Shqipërisë dhe penguar zhvillimin e sektorit të bujqësisë. Ai deklaroi se këto abuzime kanë ndikuar negativisht në mundësitë e vendit për të përfituar fonde të ardhshme nga BE-ja.
Në kundërshtim me kërkesën e opozitës, mazhoranca refuzoi të debatojë mbi raportin e OLAF, duke e cilësuar atë si një aludim nga deputetët e opozitës dhe jo një dokument të bazuar në fakte. Sipas mazhorancës, raporti është jozyrtar dhe i pabazuar, prandaj nuk justifikon një debat të posaçëm në Kuvend. Nga ana e saj, mazhoranca përmes ministres së Shtetit, Elisa Spiropali, e justifikoi shmangien e mocionit me faktin se debatet bëhen mbi bazën e raporteve dhe konkluzioneve përfundimtare, jo mbi aludime dhe akuza politike me qëllim final gjyqin popullor.
Bardhi, megjithatë, kundërshtoi këtë qëndrim, duke theksuar se raporti është publik dhe i disponueshëm në faqen e Komisionit Europian, duke i bërë thirrje mazhorancës të marrë seriozisht akuzat dhe të ndërmarrë veprime konkrete për të adresuar problemet e ngritura.
Ndërkohë Gazeta Reforma, verifikoi se raporti i OLAF është publik në faqen zyrtare të Komisionit Europian.
Lexo më shumë:
Masakra me fondet e bujqësisë, mazhoranca nuk pranon debat për raportin e OLAF
