Në vend të kryeministrit Edi Rama, ministrja Elisa Spiropali iu përgjigj akuzave të deputetit demokrat, Tritan Shehu, lidhur me njohjen dhe dënimin e gjenocidit serb në Kosovë gjatë luftës.
Spiropali, nga foltorja e Kuvendit, theksoi se maxhoranca nuk pranon të përfshihet në një garë për nacionalizëm, duke thënë: “Një herë ulen, një herë ngrihen. Në një vend si Shqipëria, ky problem kthehet në gjyle. Ka 10 vite që qeveria Rama dhe shumica jonë ka bërë një ndarje të fortë, të prerë nga ai lloji që bëhet për të folur me veten, për të dëgjuar atë jehonën.”
Ajo shtoi se Shqipëria është një faktor i rëndësishëm në politikën e jashtme dhe ka mbështetur gjithmonë Kosovën. “Jemi në dakordësi me të gjithë partnerët tanë. Ku më shumë se në Kosovë dhe për Kosovën, jemi marrë me politikën e jashtme,” tha Spiropali.
Duke iu referuar akuzave të Shehut për nacionalizëm, ajo tha: “Nuk ka dhe nuk duhet të ketë garë. Së paku ne e refuzojmë garën se kush i fryn më shumë fyellit të këtij lloji nacionalizmi. Edhe në Kosovë janë të mësuar me këtë lojë. Tema e gjenocidit shfaqet në sallën e këtij parlamenti me simetri mbresëlënëse, të përfaqësuar nga zoti Shehu.”
Kjo deklaratë pason kritikat e Shehut, i cili kishte theksuar rëndësinë e dënimit të gjenocidit serb dhe mbështetjes për Kosovën në arenën ndërkombëtare.
