Prokuroria e Posaçme Kundër Korrupsionit dhe Krimit të Organizuar nuk ka gjetur elementë të veprës penale për korrupsion aktiv apo pasiv në zgjedhje në listat me të dhënat personale të banorëve të Tiranës që Partia Socialiste zotëronte.
Veprat e sipërpërmendura ishin kompetencë e SPAK dhe sipas Report Tv, ky hetim është në fazat e fundit dhe nëse korrupsioni nuk do të faktohet, dosja do t’i kalojë Prokurorisë së Tiranës për veprën penale vjedhja e të dhënave personale.
Çështja e listave me të dhënat personale që PS zotëronte, hapi një debat të madh para zgjedhjeve. Për më shumë se 900 mijë banorë të Tiranës me të drejtë të votës, kishte database se për cilin ata votonin, çfarë preference politike kishin apo edhe të dhëna si numri i telefonit dhe numri i kartës ID. Për çdo person në listë, ishte një person tjetër që i mbikëqyrte dhe që quhej “patronazhist”.
Ky është vendimi i radhës nga SPAK që zbeh besimin e publikut. Kujtojmë që SPAK shpalli moskompetencë për shqyrtimin, e çështjes së Bajrajve duke e dërguar në Gjyakëtn e Shkodrës. Me shpalljen e moskompetencës, rrjedhimisht ra edhe akuza për grup të strukturuar kriminal, edhe pse Bajrajt njihen si një strukturë e rrezikshme. Akuzat që rëndonin mbi grupin e Bajrajve kishin të bënin me “Vrasje me paramendim”, “Kanosje me qëllim tjetërsim pasurie”, “Armëmbajtje pa leje” dhe “Shpërdorim detyre”. Pavarësisht këtyre, SPAK hoqi dorë nga çështja, duke shënuar një nga momentet kur ky organ i drejtësisë ngriti dyshime tek publiku për besueshmërinë e tij.
