Zyrat e Kadastrës së Tiranës janë rrethuar nga policia teksa mësohet se janë lëshuar urdhër arreste nga Prokuroria e Posaçme për disa zyrtarë.
Aksioni është ndërmarrë pasi ka dyshime për falsifikim dokumentesh dhe tjetërsim pronash. Ndërkohë, mësohet se hetimi për disa zyrtarë ka nisur prej muajsh.
Deri tani mësohet të kenë rënë në pranga tre persona, ndërsa janë lëshuar pesë urdhër arreste në total, ndërkohë që aksioni është ende në zhvillim dhe po kryhet nga drejtoria e Krimit Ekonomik në Policinë e Shtetit.
Kujtojmë se para dy javësh SPAK urdhëroi arrestimin e kryetarit të Bashkisë së Lushnjës, Fatos Tushe dhe 10 zyrtarëve të tjerë, pasi akuzohen për korrupsion në një tender që lidhet me një kompani vaditëvse, për rehabilitimin e një kanali.
Po ashtu, SPAK ndërmori edhe një aksion në Ministrinë e Brendshme, ku 9 zyrtarë përfunduan në pranga në lidhje me tendering e uniformave të policisë, me vlerë 25 milonë euro. Për tetë nga të arrestuarit në fjalë u vendos masa e sigurisë “arrest me burg”, ndërsa u la në “arrest shtëpie” Anisa Bogdani për shkak se duhej të kujdesej për fëmijën e mitur.
Për akuzat për korrupsion u arrestua më parë edhe ish-zëvendësministrja e brendshme, Rovena Voda. Ajo akuzohet se mori para në këmbim të një vendi pune në Ministri.
