Hetimet për fshehjen e pasurive nga zyrtarët e lartë janë intensifikuar, me SPAK që ka nisur procedime penale për 15 funksionarë shtetërorë gjatë vitit të kaluar.
Pse të gjithë duan të bëhen deputetë?
Publikimi i listave të kandidatëve për zgjedhjet e ardhshme ka sjellë polemika të forta në politikë. Disa emra të njohur nuk kanë arritur të sigurojnë një vend në lista, ndërsa të tjerë kanë zhvilluar beteja të forta për një mandat. Arsyeja nuk lidhet vetëm me pagën e lartë prej 3 mijë eurosh në muaj, por edhe me përfitimet e shumta të lidhura me këtë post.
Shumë deputetë kanë përfituar leje ndërtimi dhe favore të ndryshme gjatë mandateve të tyre. Deklaratat e pasurisë pranë ILDKP tregojnë se është e rrallë të gjesh një deputet me pasuri modeste. Ka raste ku politikanët kanë hyrë në Kuvend me një apartament 1+1 dhe kanë dalë me vila, prona, ullishte, makina luksoze, të regjistruara shpesh në emër të familjarëve apo bashkëshortëve.
SPAK nis hetimet për pasuritë e pushtetarëve
Në një kërkesë zyrtare drejtuar Prokurorisë së Posaçme, “Pamfleti” kërkoi informacion mbi hetimet për fshehjen e pasurive nga politikanët. Në përgjigjen e tij, SPAK konfirmoi se gjatë vitit 2024 janë regjistruar 15 procedime penale për zyrtarë të lartë të dyshuar për “Refuzimin për deklarimin, mosdeklarimin, fshehjen ose deklarimin e rremë të pasurive, interesave privatë të personave të zgjedhur dhe nëpunësve publikë”.
Edhe pse nuk janë bërë publikë emrat, burime të ndryshme konfirmojnë se në listë figurojnë personalitete të rëndësishme nga të gjitha krahët politikë. Nga Partia Demokratike, nën hetim dyshohet se janë Asllan Dogjani, Luan Baçi dhe Flamur Noka. Po ashtu, në listën e SPAK figurojnë edhe emra të njohur nga Partia Socialiste, të cilët aktualisht mbajnë poste të rëndësishme në qeveri.
A do të përballet politika me drejtësinë?
Ky zhvillim vë në provë seriozitetin e reformës në drejtësi dhe rolin e SPAK në ndjekjen e zyrtarëve të dyshuar për korrupsion dhe pasuri të pajustifikuara. Rasti i Alda Klosit, ish-zyrtarja e shtetit e kapur me 500 mijë euro të fshehura në shtëpi, është vetëm një nga shembujt që ka tronditur opinionin publik. Tani mbetet për t’u parë nëse drejtësia do të jetë e barabartë për të gjithë apo nëse disa emra do të shpëtojnë nga ndëshkimi.
Hetimet e SPAK pritet të sjellin zhvillime të reja në politikën shqiptare, me mundësinë që disa nga këta zyrtarë të përballen me pasoja ligjore në muajt e ardhshëm.
