Teksa ndodhet prapa hekurave që prej 16 dhjetorit 2021, SPAK ka kërkuar 10 vite burg për ish ministrin Lefter Koka. Prokuroria e Posaçme kundër Krimit dhe Korrupsionit (SPAK) ka kërkuar edhe 4 vite burg për ish deputetin e PS Alqi Bllako, të përfshirë në skemën e inceneratorëve. Nga gjykimi i shkurtuar, ish-ministri të mjedisit Koka dënimi i ulet në 4.6 vite ndërsa Bllakos në 2.8 vite burg.
Kujtojmë që ish-deputeti i Partisë Socialiste, Alqi Bllako akuzohet se ka përfituar afro 14 milion e 600 mijë lekë pasi ka falsifikuar dokumente për të shpronësuar një tokë për ta kthyer nga një tokë arë në truall në bashkëpunim me ish-ministrin e Mjedisit Lefter Koka e kryetarin e shpronësimeve, Pëllumb Abeshi. Por, Koka ndodhet pas hekurave për këtë çështje prej më shumë se dy muajsh, edhe pse e ka apeluar disa herë masën e sigurisë duke përdorur si justifikim edhe gjendjen e tij shëndetësore.
Ndërkohë, avokati i Lefter Kokës, Saimir Visha e quan skandaloze vendimin e SPAK për dënimin e klientit të tij. Për mediat, ai u shpreh se ky vendim është marrë për shkak të presionit politik. Më tej, ai shton se vendimi është i padrejtë, madje thotë se dënimi është katërfishuar.
“Ka shumë qëndrime të ndryshme. Këtu në këtë gjykatë janë gjykuar më dhjetra të akuzuar, për këtë vepër penale ka kaluar në ekstremitet. Për mendimin tim kjo është skandal. Më qindra çështje i kanë kaluar SPAK-ut për shpërdorim detyre, dhe janë anashkaluar. Kjo ka ndodhur për shkak të presionit politik. Shpresojmë që prokuroria ta rishikojë çështjen sepse këto vendime janë katërfishuar, dhe janë të padrejta”– tha Visha për gazetarët.
KËRKESA E SPAK:
Lefter Koka, 10 vite, me gjykim të shkurtuar përfiton 6.8 vite.
Alqi Bllako 4-2.8
Serafin Papa 4 vite
Pëllum Abeshi 4 vite
Jonida Zqeqo 4 vite
Bardhyl Çabiri 4-2.8 vite
Mirel Mërtiri 10 -6.8 vite
Stela Gygallja 7 -4.8 vite
