Gjykata e Posaçme për Korrupsionin dhe Krimin e Organizuar ka vendosur të kalojë për gjykim çështjen ndaj deputetit të Partisë Socialiste, Plarent Ndreca, dhe 15 të pandehurve të tjerë, të akuzuar për shkelje në tendera dhe falsifikim dokumentesh.
Sipas vendimit të datës 20 mars 2025, trupa gjykuese e kryesuar nga gjyqtarja Elsa Ulliri ka pranuar kërkesën e Prokurorisë së Posaçme Kundër Korrupsionit dhe Krimit të Organizuar (SPAK) dhe ka caktuar një trup gjykues të ri për shqyrtimin e çështjes.
Akuzat dhe procedurat hetimore
SPAK ka dërguar për gjykim procedimin penal nr. 240/2021, që përfshin 16 ish-zyrtarë të Ministrisë së Brendshme dhe institucioneve të tjera, të cilët dyshohet se kanë kryer shkelje të rënda gjatë procedurave të prokurimit publik në vitin 2019.
Hetimet kanë zbuluar se zyrtarët e Ministrisë së Brendshme, Agjencisë së Zhvillimit të Territorit, Agjencisë Kombëtare të Planifikimit të Territorit dhe Inspektoratit Kombëtar të Mbrojtjes së Territorit kanë favorizuar një bashkim operatorësh ekonomikë në kundërshtim me ligjin për prokurimet publike.
Në qendër të hetimeve është kontrata e prokurimit publik për “Studimin dhe Projektimin e disa objekteve të Prokurorisë së Shtetit”, me një vlerë fillestare prej 54,234,000 lekë (pa TVSH). Kontrata përfundoi duke përfshirë vetëm dy objekte policore me një vlerë të reduktuar prej 34,248,000 lekë, pasi Ministria e Brendshme nuk kishte fondet e plota, por e lidhi kontratën në mënyrë selektive për të favorizuar fituesin.
Roli i Plarent Ndrecës dhe zyrtarëve të tjerë
Nga provat e mbledhura, rezulton se një grup zyrtarësh, nën drejtimin e Plarent Ndrecës, ish-Sekretar i Përgjithshëm i Ministrisë së Brendshme dhe Titullar i Autoritetit Kontraktor, kanë kryer shkelje në fazat e tenderit për të shpallur fitues shtetasin Gjon Radovani, pavarësisht se ky i fundit nuk përmbushte kriteret ligjore.
Ndër të pandehurit për “Shkeljen e barazisë në tendera” janë:
- Denisa Skënderaj
- Blendi Kovi
- Lira Kolasi
- Ferdinant Tarazhi
- Grida Isufi
- Jonarda Qurku
- Lindita Mukaj
- Silva Dauti
- Denisa Klosi
- Julia Hysa
- Elora Kokalari
- Aida Shehi
Ndërsa për “Falsifikim dokumentesh” akuzohen:
- Klejdi Meço
- Emiliano Mehmeti
- Erand Rrobaçi
Një komision i ngritur për të marrë në dorëzim projektin, i përbërë nga Emiliano Mehmeti, Klejdi Meço dhe Erand Rrobaçi, ka nënshkruar procesverbale të rreme për dorëzimin e projektit, ndërkohë që ai nuk ishte realizuar plotësisht.
Dëmi financiar dhe ecuria e çështjes
Sipas SPAK, nga veprimet e paligjshme i është shkaktuar shtetit një dëm financiar prej 34,248,000 lekësh. Pavarësisht faturave të lëshuara nga përfituesi i kontratës, kjo shumë nuk është ekzekutuar për shkak të auditimeve nga Drejtoria e Përgjithshme e Policisë së Shtetit, të cilat evidentuan shkeljet e procedurave.
Nga të 16 të pandehurit, të gjithë përveç Plarent Ndrecës, kanë kërkuar gjykim të shkurtuar.
Ndreca, kandidat për deputet në zgjedhjet e 11 majit
Pavarësisht hetimeve dhe akuzave, Plarent Ndreca është përfshirë në listën e hapur të kandidatëve për deputet të Partisë Socialiste për zgjedhjet e 11 majit. Gjykimi i tij do të jetë një çështje e rëndësishme politike dhe ligjore në muajt në vijim.
