Prokuroria e Posaçme Kundër Korrupsionit dhe Krimit të Organizuar (SPAK), në kuadër të Skuadrës së Përbashkët Hetimore (SPH) me autoritetet franceze, ka përfunduar hetimet dhe ka dërguar në gjykim pranë Gjykatës së Posaçme të Shkallës së Parë procedimin penal nr. 38, 2023, për tre të pandehur:
• Redian (Refik) Doda akuzohet për “Trafikim të lëndëve narkotike” dhe “Pastrimin e produkteve të veprës penale” si pjesë e një grupi të strukturuar kriminal, si dhe “Grup i strukturuar kriminal”. Ai ka qenë i përfshirë në 5 episode të trafikut të drogës gjatë periudhës 22.01.2023 – 18.06.2024.
• Zabit (Artur) Fisniku akuzohet për “Trafikim të lëndëve narkotike” dhe “Grup i strukturuar kriminal” në 3 episode gjatë periudhës 22.01.2023 – 13.03.2023.
• Fabi Isaku akuzohet për “Trafikim të lëndëve narkotike” dhe “Grup i strukturuar kriminal” në 3 episode gjatë periudhës 22.01.2023 – 13.03.2023.
Hetimet e kryera nga autoritetet franceze dhe SPAK zbuluan se grupi ishte i vendosur në qarkun e Lionit, ku furnizonte grupet e shitjes të drogës në qarqet e Rhone, Ain, Savojë dhe Savojë e sipërme.
Gjithashtu, hetimet zbuluan se ky grup kryente dërgesa të lëndëve narkotike pothuajse çdo ditë. Gjatë hetimeve u identifikuan dhe u proceduan 19 persona të përfshirë në aktivitetin kriminal të narkotikëve.
Në përfundim të hetimeve, janë identifikuar dy drejtues të grupit, Redian Doda dhe Zabit Fisniku, ndërsa Fabi Isaku dhe të tjerë kishin role mbështetëse.
