Sot, më 12 maj, bota shënon Ditën Ndërkombëtare të Infermierëve, një ditë që i kushtohet vlerësimit dhe mirënjohjes për punën jetike që infermierët kryejnë çdo ditë në kujdesin ndaj pacientëve.
Kjo datë përkon me lindjen e Florence Nightingale, figurës themelore të infermierisë moderne, e cila lindi 202 vite më parë dhe u bë e njohur për përkushtimin e saj gjatë Luftës së Krimesë, ku trajtonte ushtarët me përkushtim të rrallë, shpesh gjatë natës, duke fituar mbiemrin “Zonja me Llambë”.
Në vitin 1974, Organizata Botërore e Shëndetësisë shpalli zyrtarisht 12 majin si Ditën Ndërkombëtare të Infermierëve për të njohur rolin thelbësor që kjo kategori profesionistësh ka në sistemet shëndetësore anembanë botës.
Gjatë pandemisë së Covid-19, infermierët përkrah mjekëve u shndërruan në figura të sakrificës dhe guximit, duke përballuar sfida të mëdha, mbingarkesë të jashtëzakonshme dhe rrezik të lartë për jetën. Kjo periudhë nxori në pah jo vetëm profesionalizmin e tyre, por edhe humanizmin që e karakterizon këtë profesion të palodhur.
Dita e sotme është më shumë se një përvjetor, është një thirrje për respekt, mbështetje dhe investim të vazhdueshëm në rolin e infermierëve. Ata janë zemra e sistemit shëndetësor, kujdestarët e përkushtuar të mirëqenies sonë.
