Shqipëria shënon sot ditën e shtatë e vaksinimit masiv në vendin tonë! Efektivët e policisë në të gjithë vendin do të nisin të marrin sot vaksinën anti-COVID. Procesi ka nisur nga Tirana në stadiumin ‘Air Albania’ ku është përdorur vaksina kineze Sinovac.
500 efektivë policie, kryesisht efektivë të Forcave të Rendit dhe Forcat e Ndërhyrjes së Shpejtë, kanë marrë dozën e parë këtë të shtunë në ambientet e stadiumit Air Albania.
Kreu i Policisë së Tiranës, Rebani Jaupi, e ka shfrytëzuar procesin e nisjes së vaksinimit për t’ju bërë thirrje partive që të respektojnë masat e vendosura për shkak të COVID19. Jaupi tha se pavarësisht se është fushatë, masat duhet të respektohen.
“Ne nuk duhet të jemi shkaku i një acarimi midis politikanëve e policisë, natyrisht që thirrja jonë është që gjithsecili të ruajë distancimin pavarësisht se jemi në fushatë. Ju bëj thirrje subjekteve që përkrahësit e tyre të kërkojnë në vijimësi distancimin dhe maskat”, tha Jaupi.
Sot nisi vaksinimi i forcave policore në të gjithë Shqipërinë. 500 efektivë morën vaksinën kineze Sinovac në Air Albania, ndërsa 11 mijë efektivë do të vaksinohen në vijimësi gjatë ditëve të ardhshme. Policia e Shtetit është sektori i radhës që pritet të imunizohet ndërsa në total në të gjithë vendin janë vaksinuar 172 mijë persona.
