Ditën e sotme në vendin tonë ka nisur vaksinimi në komunitet, me njësitë e lëvizshme për të gjithë personat të cilët nuk kanë mundësi të paraqitet në qendrat e vaksinimit. Ministrja e Shëndetësisë dhe Mbrojtjes Sociale, Ogerta Manastirliu ka ndjekur nga afër procesine njësive të lëvizshme në zonën e Shkozës, në periferi të kryeqytetit. Ministrja Manastirliu ka thënë se përgjatë periudhës së verës njësitë e lëvizshme do të jenë derë më derë, për të vaksinuar të gjithë qytetarët edhe në ato zona që ka qenë e pamundur të shkohet deri më tani.
“Përgjatë gjithë verës ne do të jemi derë më derë, duke vijuar fushatën tonë të vaksinimit edhe nëpërmjet njësive të lëvizshme. Po shkojnë në zonat e thella të vendit, duke mundësuar që të kemi një rritje të mbulesës vaksinale për grupmoshat e përcaktuara”, tha Manastirliu.
Ndër të tjera ministrja ka bërë të ditur se gjatë muajve korrik dhe gusht në vendin tonë do të mbërrijnë rreth 500 mijë doza të tjera vaksinash. Gjithashtu Manastirliu ka dhënë lajmin se pritet që sot të vijnë mbi 18 mijë vaksina Pfizer.
“Ndërkohë që vijojmë dhe presim furnizimin e vazhdueshëm me vaksina, sot vijnë edhe 18,720 B, ndërkohë që përgjatë këtyre muajve, korrik-gusht do të kemi një furnizim të bollshëm në vaksina, rreth 500 mijë doza të vaksinave, të cilat do të mbërrijnë për të siguruar një qëndrueshëmri në programin tonë të vaksinimit”, tha Manastirliu.
Ministrja e Shëndetësisë tha se do të intensifikohet procesi i vaksinimit, duke bërë me dije se ditët e hapura të vaksinimit do të vijojnë përgjatë korrikut dhe gushtit, për qytetarët mbi 18 vjeç.
Drejtoresha e Operatorit të Shërbimeve të Kujdesit Shëndetësor, Mirela Cami u shpreh se vaksinimi me njësitë e lëvizshme do të shtrihet me shtatë njësi lëvizëse në të gjithë territorin, duke rritur aksesin për qytetarët. Ndërsa drejtoresha e Institutit të Shëndetit Publik, prof. Albana Fico u shpreh se është shumë e rëndësishme që qytetarët t’i kryejnë të dy dozat e vaksinës, për të siguruar efektivitetin e nevojshëm për t’u mbrojtur nga COVID19.
Nga fillimi i procesit të vaksinimit janë kryer 1,022,802 doza të vaksinës ndaj COVID19. Prej tyre 434,926 qytetarë i kanë marrë të dyja dozat e vaksinës antiCOVID.
