Besimtarët myslimanë në mbarë vendin festuan sot Kurban Bajramin, njërën prej festave më të rëndësishme në kalendarin islam.
Që në orët e para të mëngjesit, xhamitë u mbushën me besimtarë që iu drejtuan faljes së Namazit të Bajramit, duke përcjellë një atmosferë të ngrohtë shpirtërore dhe komunitare.
Në Tiranë, mijëra besimtarë u mblodhën në bulevardin “Dëshmorët e Kombit” për t’u falur në hapësirë të hapur, ndërsa xhamitë e kryeqytetit ishin gjithashtu plot me besimtarë që kremtonin këtë ditë të shenjtë me lutje dhe përkushtim.
Kurban Bajrami është më shumë sesa një festë rituale, ajo simbolizon sakrificën, përkushtimin ndaj Zotit dhe ndihmën për ata që kanë më pak.
Therja e kurbanit, siç e përcakton tradita, shoqërohet me ndarjen e mishit mes familjarëve, miqve dhe veçanërisht ndaj të varfërve, duke reflektuar një ndjesi të thellë solidariteti dhe barazie.
Kjo ditë është gjithashtu një kujtesë për historinë e fesë islame, e lidhur me ngjarje madhore si rindërtimi i Qabes, obligimi i Haxhit dhe origjina e emërtimit “mysliman”.
Kurbani mbart një dimension të thellë shpirtëror, por edhe një përgjegjësi sociale, të ndihmosh dhe të jesh pranë tjetrit.
Për besimtarët, Kurban Bajrami është një thirrje për paqe, forcim të lidhjeve familjare dhe besim më të thellë.
Në këtë frymë, shumë prej tyre ndanë edhe shqetësimin për luftën në Gaza, duke përcjellë mesazhe të lutjes dhe dhembshurisë për popullin palestinez.
“Na dhemb zemra për vëllezërit tanë në Gaza. Lutemi që Zoti t’i mëshirojë dhe t’u japë forcë. Është e trishtueshme që bota nuk reagon për ta”, u shprehën disa prej besimtarëve pas faljes.
