Dita e sotme shënon plot 13 vite targjedia e Gërdecit ku humbën jetën 26 persona dhe mbetën të plagosur qindra të tjerë. Një magazinë që ishte kthyer në fabrikë për demontimin e armëve shpërtheu duke shkatërruar shumë shtëpi e mbi të gjitha i mori jetën shumë njerëzve mes të cilëve gra e fëmijë.
Edhe pse ka kaluar më shumë se një dekadë nga ngjarja e rëndë, askush nuk është dënuar. Fatmir Mediu, që në atë kohë ishte Ministër i Mbrojtjes dha dorëheqjen një javë pas ngjarjes, ndërsa sot kandidon sërish për të përfaqesuar qytetarët në Parlament.
Edi Rama që ishte në atë kohë në opozitë e akuzoi qeverinë e Berishës për përfshirje në një rrjet të madh të trafikut të armëve. Partia Socialiste së bashku me LSI-në mbajtën edhe disa protesta e mbi të gjitha premtuan zbardhjen e ngjarjes kur të vinin në pushtet. Ajo që realisht ndodhi ishte se LSI hyri në koalicion me Partinë Demokratike dhe në 4 vitet e tyre të qeverisjes çështja nuk pati asnjë zhvillim pozitiv.
Po ashtu LSI u fut në koalicion me Partinë Socialiste në zgjedhjet e vitit 2013, të cilat i fituan edhe me premtimin se do të zbardhnin dy ngjarje të rënda të qeverisë Berisha; ‘Gërdecin’ dhe ‘21 janarin’. Por edhe pse Rama ka kaluar tashmë 8 vite në qeverisje, asnjë përpjekje nuk është bërë për të nxjerrë para ligjit përgjegëjsit e dy krimeve të rënda. Premtimet vazhdojnë, ndërsa gjaku i viktimave të pafajshme që humbën jetën si pasojë e pazareve të pasanikëve e politikanëve, nuk duhet harruar.
