Kryetari i Partisë Demokratike, Sali Berisha, komentoi fitoren e Donald Trump në Shtetet e Bashkuara, duke thënë se kjo e ka “prishur festën” e qeveritarëve socialistë në Shqipëri, të cilët, sipas tij, ishin të bindur se Kamala Harris do të fitonte.
Ai shtoi se qeveritarët shqiptarë kishin përgatitur një festë me torta, shampanjë dhe fishekzjarrë, duke pritur fitoren e Harris, e cila, sipas tij, është përfaqësuese e ekstremit të majtë.
Berisha theksoi se fitorja e Trump, që ai e quajti “mrekulli amerikane”, ishte një triumf jo vetëm për SHBA-në, por edhe për botën e lirë.
Ai gjithashtu kritikoi disa prokurorë të përgjithshëm të lidhur me miliarderin George Soros, duke thënë se ata kanë lënë detyrën pas 5 nëntorit.
Berisha pretendoi se 70% e prokurorëve të “Soros” janë shkarkuar ose kanë dhënë dorëheqjen, ndërsa disa janë larguar për shkak të lidhjeve me krimin.
Sipas tij, kjo është një fitore për drejtësinë dhe SHBA-në, e cila shpëtoi nga ndikimi i “kriminelëve dhe narkoprokurorëve” që kishin mbështetje nga Soros.
