Ambasadori i Bashkimit Europian në Shqipëri, Luigi Soreca ka folur për amendamentet që Partia Demokratike depozitoi në Kuvend për vettingun e politikanëve, zhbërjen e ndryshimeve kushtetuese dhe reformën territoriale. Në një deklaratë për mediat nga Korça, Soreca tha se kjo është mënyra si funksionon demokracia, tashmë që opozita është kthyer në Kuvend dhe dërgon nismat e saj.
“Ne nuk kemi pasur ende mundësinë që ta shohim propozimin dhe në fakt e dimë që është dorëzuar nga PD në kuvend. Siç e thashë edhe dje kjo është demokracia, ja si funksionon ajo, që opozita është kthyer në Kuvend dhe dërgon nismat e veta”, u shpreh ambasadori.
I pyetur nëse BE do të bashkëpunojë me PD, nëse Berisha rikthehet në krye, Soreca tha se do të ndiqen zhvillimet brenda partisë dhe asgjë nuk do të ndryshojë.
“Ne punojmë me të gjitha forcat politike, ne kemi bashëpunuar me PD edhe kur ajo ishte jashtë Kuvendit, dhe ne do të ndjekim zhvillimet brenda partisë, asgjë nuk do të ndryshojë. Ne do të vazhdojmë të punojmë me të gjitha forcat politike”, tha ai.
Ambasadori u ndal veçanërisht te liria e medias pasi u pyet për Agjencinë e Medias që u propozua nga Rama, dhe tha është një rol kyç që gazetarët të marrin pjesë në aktivitetet e zhvilluara nga institucionet.
“Është roli kyç i medias dhe gazetarve të marrin pjesë në aktivitet që zhvillon çdo institucion. Media duhet të jetë e lirë”, tha Soreca.
