Kompanitë celulare, veçanërisht Vodafone kanë rritur fitimet deri në dyfish nga pandemia, sidomos nga përdorimi i internetit për mësimin online. Në fillim të pandemisë vetëm një muaj zgjati solidariteti i këtyre kompanive duke ulur çmimet e paketave, më pas iu kthyen zakonit.
Mësimi me celular
Organizata e studentëve “Qëndresa Qytetare” ka publikuar gjetjet e sondazhit të realizuar me 610 studentë nga 9 universitete publike mbi efektivitetin dhe ecurinë e mësimit online për vitin akademik 2020 – 2021.
Sipas të dhënave të mbledhura, 77.5% e studentëve e ndjekin mësimin online nëpërmjet telefonit, 20.5% nëpërmjet laptopit ose kompjuterit dhe vetëm 2% e aksesojnë mësimin nga tabletat e tyre. Nisur nga mundësitë e pakta që ofron telefoni celular për të aksesuar dokumente dhe për të ndërvepruar me detyra kursi, mund të themi që pjesa më e madhe e studentëve janë të kufizuar në pjesëmarrje cilësore në mësimin online.
Kostot
Studentëve gjatë ndjekjes së mësimit në distancë u është shtuar një kosto permanente mujore si ajo e blerjes së paketave të internetit, cila përllogaritet të jetë mbi 2 milionë Euro/muaji. Bazuar në të dhënat e sondazhit 50.6% e studentëve shpenzojnë 20 euro në muaj për internet, 30.5% e tyre shpenzojnë 10 euro ndërsa 18.9% e studentëve shpenzojnë 30 euro e lart për të blerë internet me qëllim ndjekjen e mësimit online. Nga ana tjetër asnjë nga 9 universitet publike nuk ka bërë reduktim të tarifës së studimit pavarësisht reduktimit të kostove administrative që kanë pasur.
Pjesëmarrja
Pjesëmarrja mesatare e studentëve në seminare dhe leksioneve në 9 universitete publike është në masën 60%. Ndërkohë që 38.5% e studentëve janë shprehur se nuk janë respektuar oraret gjatë mësimit online. Studentët e Universitetit Bujqësor të Tiranës e kanë ndjekur mësimin online në masë më të madhe 79%, ndërsa studentët e Universitetit “Aleksandër Moisiu”e kanë ndjekur mësimin online në masën më të vogël me vetëm 39%.
Studentët e 9 universiteteve publike e kanë vlerësuar me notën 6 efektivitetin e mësimit online, me notën 7 – 8 gatishmërinë e pedagogëve dhe me notën 5 – 6 shërbimin e ofruar nga sekretaritë e fakulteteve, duke shënuar kështu një diferencë mes shërbimeve të cilat ata paguajnë drejtperdrejt me tarifat dhe shërbimit të pedagogëve të cilët mbulohen nga buxheti shtetit.
Kërkesat e studentëve
Referuar situatës së krijuar, “Qëndresa Qytetare” i bën apel Ministres Kushi dhe qeverisë për një fond specifik në buxhetin e vitit 2021 për sigurimin e qasjes në internet dhe mjete digjitale për të gjithë studentët.
Po ashtu tërhiqet vëmendja të ndryshohet ligji për Arsimin e Lartë, duke parashikuar “distance learning” si një nga format e mësimdhënies në arsimin e lartë. Pasi në këtë mënyrë mund të mos njohen diplomat.
Studentët kërkojnë rivlerësim të tarifës së studimit duke marrë parasysh reduktimin e kostove administrative për shkak të mos përdorimit të ambienteve universitare
Para një muaji studentët kanë protestuar para Ministrisë së Arsimit, para Ministrisë së Shëndetësisë dhe para Kryeministrisë kundër vendimit të qeverisë për të zhvendosur online mësimin në universitete.
Përpara Kryeministrisë, studentët në mënyrë demonstrative kanë hedhur në tokë librat, rrobat dhe sendet e tjera, të cilat mesa duket do të përdoreshin prej tyre në konvikte, të cilat me vendim të komitetit teknik do të qëndrojnë të mbyllura si vatra të rrezikshme infeksioni.
Një përfaqësi e studentëve kanë protestuar para Ministrisë së Shëndetësisë ku kanë dorëzuar edhe një kërkesë për komitetin teknik, të cilit i kërkojnë kthimin e pjesshëm në auditorë.
Ndërkohë, ata kanë paraqitur një listë me kërkesa për Ministrinë e Arsimit, ku përveç kërkesës për mësim të alternuar mes online dhe në auditorë, konkretisht leksione online dhe seminaret në auditorë, studentët kanë edhe kërkesa të tjera të natyrës ekonomike.
Në listën me kërkesa të studentëve kërkohet gjithashtu: rimbursim i pagesës së konvikteve dhe qirave, paketa interneti falas dhe të dedikuara për studentët; mundësimi i pajisjeve teknologjike të nevojshme për studentët që nuk kanë akses në mësimin online.
Reagimi i ministres Kushi
Ndërkohë, ministrja e Arsimit, Evis Kushi ka reaguar për protestën e studentëve. Duke e cilësuar këtë vit akademik tejet të pazakontë, znj. Kushi kërkon që kjo situatë të përballohet me qetësi nga studentët.
/Gazetareforma.com/
