TIRANË
Pasi Bashkimi Europian ka akorduar 180 milionë euro për Shqipërinë për të kufizuar pasojat ekonomike të shkaktuara nga pandemia e koronavirusit, ka reaguar me një mesazh në “Twitter” ambasadori i BE në Tiranë Luigi Soreca.
Kreu i Delegacionit të Bashkimit Europian në vendin tonë tha se ky është solidaritet në një kohë krize të paparë.
“Me dorëzimin e 180 milionë eurove ndihmë makro-financiare Shqipërisë, ndihmojmë vendin për të kufizuar pasojat ekonomike të COVID-19.
Bashkimi Europian tregon edhe një herë solidaritetin e tij me rajonin në një kohë të një krize të paparë”, ka theksuar ambasadori Soreca. Ne jemi të fortë së bashku”, shkruan ai.
Koronavirusi ka shkaktuar pasoja të mëdha ekonomike dhe sociale për Shqipërinë, por edhe për rajonin, Europën dhe botën.
Institucionet financiare kanë bërë parashikime të zymta për sa i përket ekonomisë, duke thënë se kriza do të jetë e pranishme në Shqipëri, por edhe më gjerë.
