Pas dy muajsh ekspozimi në Muzeun e Historisë Natyrore në Vjenë, një nga institucionet muzeale më të njohura në Europë, skulptura e rrallë prej bronzi “Kalorësi i Babunjës” është rikthyer në Shqipëri.
Lajmi është bërë i ditur nga Akademia e Shkencave, e cila sqaroi se ekspozita u organizua nga Ambasada e Shqipërisë në Vjenë, në bashkëpunim me Institutin e Arkeologjisë të Akademisë së Shkencave të Shqipërisë dhe muzeun austriak.
Hapja e ekspozitës u shoqërua me një konferencë shkencore ndërkombëtare, ku morën pjesë mbi 120 studiues nga vende të ndryshme të botës. Shqipëria u përfaqësua nga akad. Adem Bunguri, prof. Neritan Ceka, prof. Bashkim Lahi dhe prof. asoc. Eduard Shehi.
Skulptura 2600-vjeçare, e cila u zbulua në vitin 2018 pranë Apolonisë, në zonën e Babunjës (Lushnjë), qëndroi e ekspozuar në “Sallën e Artë” të muzeut nga 13 maji deri më 31 korrik 2025. Vepra u vlerësua gjerësisht nga ekspertët ndërkombëtarë dhe vizitorët për vlerat e saj të jashtëzakonshme artistike dhe historike.
Pas këtij suksesi ndërkombëtar, “Kalorësi i Babunjës” është kthyer tashmë në Tiranë, ku do të ekspozohet në mënyrë të përhershme në ambientet e Muzeut Arkeologjik, pjesë e Institutit të Arkeologjisë pranë Akademisë së Shkencave të Shqipërisë.
